Produktet mbushëse ose filler

janë produkte të injektueshme, të tretshme apo të patretshme, të cilat përdoren për rritjen e volumit apo për mbushje të rrudhave në fytyrë.
Produktet e tretshme janë produkte, efekti i të cilave zgjat për një kohë relativisht të shkurtër, 6-12 muaj. Avantazhi i tyre qëndron pikërisht në faktin se rezultati i tyre nuk është definitiv dhe në rast pakënaqësish, mjaftojnë disa muaj për t’ju rikthyer pamjes tuaj të mëparshme. Produktet e patretshme kanë një rezultat definitiv, por gjithsesi procesi i plakjes vazhdon dhe efekti i produktit nuk mund të jetë gjithmonë si në ditën e parë të injektimit të tij. Aktualisht përdorimi i tyre nuk preferohet pikërisht për këtë arsye dhe tendenca e përgjithshme shkon drejt produkteve të tretshme. Ndër to mund të radhitim acidin hialuronik dhe kolagjenin.

Acidi hialuronik

është një glycosaminoglycane që gjendet brenda qelizave të shumicës së organeve tek njeriu veçanërisht në ato të lëkurës. Me kalimin e moshës sasia e tij sa vjen dhe pakësohet duke sjellë një humbje të tonicitetit të lëkurës dhe si pasojë, plakjen e saj.

Ai përdoret duke u injektuar në lëkurë, në formën e një xheli transparent që gjendet në një shiringë me një age shumë të hollë. Duke u injektuar ai krijon volum dhe jep një pamje të shëndetshme dhe gjithë vitalitet. I injektuar nën rrudhë, ai mbush shtresat dhe i rijep lëkurës pamjen e saj të lëmuar, natyrale dhe të tendosur. Shpesh ai shoqërohet me vitaminë C e cila e ndihmon të përhapet më mirë në shtresat konjuktive.

Në funksion të zonës që trajtohet, injektimi i tij mund të paraprihet nga një anestezi e vogël lokale, me injeksion apo me krem anestezie EMLA, i cili aplikohet 20 min para injeksionit. Pas injeksionit mund të kemi një skuqje të përkohshme e cila zhduket pas 24-48 orësh. Po ashtu mund të pasojë një edemë e lehte e cila është gjithashtu e përkohshme dhe që mund të reduktohet nëse zona e trajtuar mbahet me akull, menjëherë pas injeksionit.

Mund të vërehen dhe efekte të tjera dytësore si, dhimbje në pikat e injektimit, ndjesi kruajtje, çngjyrime dhe mbi-ndjeshmëri në pikat e injektimit. Në raste shumë të rralla, < se 1 ne 2000, janë sinjalizuar reaksione mbi-ndjeshmërie. Në fakt, acidi hialuronik është një nga produktet mbushëse më të sigurta që ekzistojnë aktualisht në tregun botëror. Rreziku i komplikacioneve është shumë i vogël, por nuk mund të përjashtohet.

© Copyright 2019 - Kirurgjia Estetike Franceze | Të gjitha të drejtat e rezervuara. - Enfold Theme by Kriesi
Dërgo një mesazh